احلام ورديه

البارت (1)

احلام ورديه

صوت مزعج نتيجة تكسير واصوات ناس كتير بتتكلم

وصوت موبايل بيرن , قربت الام من الموبايل مسكته تلاقي اسم (روزتى) عليه المرة ال 10 اللي يرن فيها الموبايل بدون ماحد يرد عليه

الام: البنت دى هتجننى عندها كليه ولسه منزلتش وكمان مبتردش علي الموبايل

تلف الام وتقرب من السلم الداخلي للبيت وتنادي

الام :بسمـــــــــــة بسمـــــــــة

بنت : ايــوه يا ماما

الام: اميرة تعالي خدى موبايل اختك  بيرن من الصبح وهي سيباه هنا

اميرة(بهدوء) : دقيقه يا ماما

___________________________________

اتفتح باب الاوضه بدون استئذان , بسمه في عالم تاني  حاطة الهاند فري وقاعده تسمع اغاني وترقص معاها قدام المرايه , وهي بتلف تلاقي اميرة قدامها تصرخ وهي حاطة ايدها علي قلبها 

بسمه : ااااااااااااااااا, مش تخبطي يا اميرة  قبل ما تدخلي , خضتيني

اميرة(بهدوء) : خبطت كتير وانتى مسمعتنيش , فدخلت

تقفل بسمه mp3

بسمه : في حاجة حصلت ؟

اميرة(بهدوء): موبايلك بيرن وانتى سيباه تحت وماما مشغوله مع العمال انزلي خديه

بسمه : الموبايل , ااااااااا ياسمين هتقتلني

_______________________

تجري بسمه بسرعة وتنزل علي السلم بخطوات سريعه  تاخد الموبايل بسرعه, 10 مكالمات لم يتم الرد عليها , بسمه قبل ما ترن قاعده تبص علي اسم ياسمين وبتفكر , اخدت القرار واتصلت

بعدت الموبايل عن ودنها وعلي وشها علامات مضحكة بعد ما سمعت ياسمين وهي بتصرخ

بسمه بتقرب الموبايل شويه شويه وترد

بسمه (بصوت مضحك) : حبيبتى روز , ما انتى اتاخرتي ف اللبس اعمل ايــه , شغلت موسيقي وبــــس ........ عارفة انك قولتيلي كده بس اعمل ايه كنت زهقاااانه ...... حاضر حاضر انا اسفه روزتى

......... اااااااا اجيلك البيت ليــــه مش انتى ف الكليه ؟؟

تتنطط بسمه وف ايدها الموبايل وعلي وشها تعابير مضحكة معترضه علي كلام ياسمين ,تقرب ياسمين الموبايل  وهي بتكمل

بسمه : ليــــــــه بقي .......ما كنتى تروحي الكليه وانا هجيلك علي هناك .... حاضر

بعلامات يأس مضحكة علي وش بسمه تنهي المكالمه مع ياسمين وهي راجعه الاوضه بتاعتها مامتها توقفها وهي بتضحك عليها

الام: ههههههههههه هي عملتها فيكي تانى ؟

بسمه بعلامات يأس مضحكة علي وشها ونظرة استعطاف للام

بسمه : هو انا غلطانه , عشان تخليني اروحلها البيت اخدها ونروح الجامعه ؟

الام : تستاهلي , عشان تبقي تسمعي موسيقي وترقصي تاني

بسمه : ليه يا ماما دى حاجة حلوة بطلع فيها طاقتي يا ماما

الام: طبعا ما انتى في كليه ملهاش لازمة

بسمه : ملهاش لازمة ازاي يا ماما وهى فنون جميله وحشة

الام : عندك طب , صيدله , اسنان

عندك كليات كتير , سبتيهم كلهم واختارتي دي

وعملتى مشاكل عليها , وادي اللي بنشوفو منك رقص وموسيقي طول الوقت حتى ملهاش علاقة ب اللي بتاخديه

بسمه : تاني يا ماما الموضوع ده

الام(بضيق) : لانى مش راضيه عنه

بسمه : بس ده حلمى يا ماما

الام : لو كلنا اتبعنا احلامنا مش هننفع , يعني لو واحده بتحب الرقص تطلع ترقص

بسمه : يا ماما يا حبيبتى , هي وقتها ممكن تطلع بنوع كويس جدا مفهوش حاجة وحشه

الام : ااه يعني بتقولي ان الرقص مفهوش مشكله

ابتسمت بسمه بهدوء وحاولت تغير الموضوع

بسمه(مبتسمه) : ااه شوفتى يا ماما هتاخر علي ياسمين اهو , وصليني انتى بقي

الام : مليش دعوة اتحملي انتى العقاب لواحدك

تتنطط بسمه بعلامات اعتراض مضحكة تاني

الام : يلا خدى السواق معاكي , عشان العمال مش اسيبهم لواحدهم

بسمه (مبتسمه ) : حااااضر افندم

____________________________

في الكليه في نفس الوقت

بعض الشباب واقف يتكلم , بيمر من قدامهم شاب معلق شنطة علي كتفه , يشاور عليه شاب منهم ويبص لاصحابه , يرد واحد منهم

شاب : يابنى ده واحد مغرور , ميعرفش حد غير عشان مصلحته

رد عليه شاب تانى

شاب (باستنكار): عيل سيس يابنى عايز منو ايه غير كده  

ياسر (بضيق): انتوا مش هتبطلو الكلام ده

الشاب: يعنى انت ياعم سايب الموضوع الاساسي وقاعد تدينا محاضرة ف الكلام واللغة العربيه

ياعم فكك من الكلام ده بقي وعيش عصرك

ياسر: وهو الواحد يبقي متحضر لما يقلد اي حاجة جديده نازله

الشاب (يضحك): لو حاجة روشه وفيها ايه

ياسر(بضيق) : وبالنسبه انك مسلم , والحاجة دي اعترضت مع الاسلام

الشاب : واللي بقوله ده يعترض مع الاسلام ف ايه يا سى الفيلسوف

ياسر : القرآن نزل باللغه العربيه , واللي بتقوله ده بيشوه اللغه العربيه , دى لغه راقيه جدا كفايه انها اللغه اللي نزل بيها القرآن

احد الشباب:ههههههههههههههه راقيه ايه الكلام القديم ده , في ايه يا ياسر هو كل ما نتكلم هتقلبها مواعظ

قام ياسر من مكانه ولف ومشي بدون مايرد , وصل للمكان اللي سايب فيه العجله بتاعته , اخدها وركبها وخرج من الكليه يقعد في اي مكان  ويرجع تانى ع معاد المحاضرة الجايه

في نفس الوقت ده كان محمد قاعد لواحده بيفتكر كلام الشباب عليه , كل ما يفتكر الكلام يزداد غضبه ويشد علي ايده , قام بكل انفعال اخد الشنطه ومشي خرج من الكليه
_________________________________________

في نفس الوفت ده
بسمه ماشيه في الشارع وعربيه ماشيه جمبها بسرعه بطيئه جدا تساوى سرعتها في المشي
والسواق راجل كبير في السن  مخرج راسه من الشباك بيكلم بسمه 
  

السواق : يابنتى  هتفضلي ماشيه كده في الشارع تانى , ومتركبيش العربيه

بسمه بترد عليه وهى ماشيه

بسمه(مبتسمه) : عم حسن امشي انت بس معايا ولما نقرب هبقي اركب

عم حسن: يابنتى  لو الهانم عرفت انك مش بتركبي العربيه وبتروحي مشى كل مرة هتقطع عيشي

بسمه(مبتسمه): متخفش يا عم حسن انا وقتها هقولها انى انا اللي قولتلك كده

عم حسن (بياس) : زي ما تحبي يابنتى

لما قربت بسمه من بيت ياسمين ركبت العربيه عشان عم حسن , ولما وصلوا خرجت بسمه من العربيه وعلي وشها علامات الضيق رنت علي ياسمين , نزلت ياسمين ولما شافت وشها وهى بتتنفس بسرعة

ياسمين (بهدوء): هتعملي زي كل مرة ؟

بسمه (بابتسامه): المشي رياضه , وكمان لسه في وقت علي معاد المحاضرة , اركبي انتى مع عم حسن وانا هروح الكليه مشي

فتحت بسمه باب العربيه لياسمين وبتشاورلها تركب  

ياسمين(باعتراض): ياسلام ده علي اساس انها اول مرة

قفلت ياسمين باب العربيه

ياسمين : عم حسن معلش هنتعبك معانا , روح انت وانا هروح معاها مشي

عم حسن : طيب خدي بالك منها يابنتى دى امانه

انا مش عارف اتصرف ازاي معاها

ياسمين(مبتسمه): عارفه انها متعبه يا عم حسن

متوصلهاش تاني بعد كده , و هاخد بالي منها , روح انت ياعم حسن

عم حسن : حاضر يا بنتى

________________________________

مشيت ياسمين وبسمه

ياسمين : انتى لسه معرفتيش طنط الموضوع ده

بسمه( مبتسمه بعدم اهتمام) : دى حاجة تخصني انا وانا اللي هحلها

ياسمين(بتعجب) :وطنط مش حست بالمشكله دي ؟

ياسمين(  مبتسمه) : عامله حسابي في كل حاجة

ياسمين: اه صحيح لما انتى بتتعبي لما بتركبي العربيه ليه بتركبي مع عم حسن

بسمه : عم حسن بيحس انو مقصر معايا وبيستحرم الفلوس اللي بياخدها علي اساس انو بيوصلنى وبيجبنى, عشان كده بركب معاه المسافه القصيرة دى

ياسمين : طيب عرفيه انك بتتعبي من العربيه

بسمه (بضيق): لا طبعا لانو وقتها هيحكى لماما , عم حسن بيشتغل في بيتنا من ساعة اللي حصل زمان ومن وقتها وهو بيهتم بيا , ولو عرف هيقول لماما عشان قلقان عليا

_____________________________________

اتاخرت ياسمين و بسمه علي المحاضرة , بسمه بتجري وبتلف تنادى علي ياسمين

بسمه (باستعجال): يلا يا روز بسرعة مش وقت تقولي كلام الناس هنتاخر

ياسمين بتسرع في مشيتها بدون جري

ياسمين : انتى اللي عملتى فينا كده

بسمه واقفة في ماكنها بتجري

بسمة : ما انتى اللي مش روحتى علي الكليه علي طول

شاب راكب عجله وبيجري بيها بسرعه وبسمه واقفه في الطريق اول ما شافها بعد عنها بسرعه و وقف العجله وبيجري علي بسمه وهو سامع ياسمين بتصرخ وبتجري

ياسمين : بسمه 

بسمه واقفه في مكانها مش بتتحرك بتبص للشخص اللي بيوقف العجله وبيجري عليها, ياسمين بتجري عليها  

ياسمين (بقلق): انتى كويسه , بسمه انتى كويسه

بسمه مش حاسه بحاجة وشايفه شريط بيمر قدامها عجله بتجري عليها بسرعة توقعها وناس بتشدها

تبدا تصرخ وتقع علي الارض , ياسمين بتصرخ بأسمها وتبص للشخص اللي كان راكب العجله 
  

ياسمين (بغضب): انت مبتشوفش , انت اعمي

رد الشاب

الشاب: انا اسف , ب ب بس مكنش قصدى والله كنت هت..

ياسمين (بغضب ): انت هتبسبس هنا

وترجع لبسمه تحاول تفوق فيها وهى مش حاسه ان الكليه اتجمعت عليهم
____________________________

في عياده الكليه فاقت بسمه وهى مشوشه, وسامعه صوت ضعيف , وصورة اشخاص مشوشه , تغمض عينها تانى وهى سامعه تردد صوت بينادى باسمها 
تبدا تشوف صوره اشخاص بيشيلوها وهى بتصرخ وبيحطوها في عربيه

وتفوق في مكان مقفول وضلمه , يتفتح الباب ويظهر شخص ضخم بيضحك بضحكة مخيفه , تصرخ بسمه

وتفوق بفزع , تلاقي ياسمين قدامها 

ياسمين(بقلق): متخافيش انا هنا معاكى , اهدى يا بسمه

تبص ياسمين بقلق عشان تتاكد وتفوق علي صوت غريب بيتاسف

الشاب : انا اسف , حضرتك كويسه ؟

بصت بسمه ل ياسمين بتعجب اكنها بتسالها مين الشخص ده , بصت ياسمين للشاب بغضب

ياسمين : هو اللي كان هيخبطك بالعجلة

لفت ياسمين وشها للشاب

ياسمين (بغضب): لما انت مبتعرفش تستعمل العجله بتركبها ليه وتاذي خلق الله

اتعصب الشاب ورد

الشاب: لاحظى يا انسه انى قاعد اتاسف من ساعتها , لاكن العجله مبتعملش كل ده ولكن انا اسف

ضحكت بسمه

بسمه : هو فعلا يا ياسمين العجله مبتعملش كده مش تحمليه المسؤوليه , وانتى عارفه السبب

لفت ياسمين وشها بلامباله بعيد عن الشاب

بسمه : انا اسفه جدا , عن المشاكل اللي حصلت بسببي , وبعتذر عن عصبيه ياسمين , هى بس كانت خايفه عليا

الشاب : مفيش مشكله , المهم ان حضرتك كويسه

بسمه : شكرا لحضرتك

الشاب: طيب اذا كان كده اقدر امشي ؟

بسمه : اتفضل

بعد ما مشي الشاب لفت بسمه لياسمين

بسمه : انتى بهدلتيه خالص ياروزتى , حرام عليكى مكنش يقصد

ياسمين : امال عيزانى اشكره

ضحكت بسمه علي ياسمين , وياسمين بصالها باستغراب

ياسمين : بتضحكى علي ايه ؟

بسمه :ولاحاجة , هو الساعه كام ؟

ياسمين بصت ف الساعه, وردت بلامباله وسخريه 

ياسمين : فاتتنا اول محاضرة طبعا والتانيه والتالته بدات , تحبي تروحي ونبدا من بكرة يوم جديد ولا نروح ع المحاضرة ؟

بسمه (بارهاق مبتسمه): احنا جينا علي الاقل نحضر حاجة نستفيد منها قبل ما نروح

ياسمين : طيب ماشي

بسمه قامت بمساعدة ياسمين وحضروا المحاضرة اللي عليهم وخرجوا, كانت بسمه فاقت شويه من تعبها

_______________________________________

 بسمه ماشيه مركزة مع ياسمين واكنها بتسمع لحاجة , بصت بسمه لياسمين

بسمه(بتركيز) : هو ده صوت موبايلك ؟

ياسمين بترفع الشنطة عند ودنها عشان تسمع الصوت منها ولا لا

ياسمين :اه ده بتاعي

فتحت الشنطة وقعدت تدور علي الموبايل وهى ماشيه مع بسمه

ياسمين (بضيق): مش لاقيه المو...اااااه

وقعت ياسمين علي الارض لانها اصتدمت بشاب , نزلت بسمه علي الارض عشان تساعدها تقف

بسمه(بقلق): انتي كويسه

قامت ياسمين من علي الارض وبترفع وشها عشان تعتذر

الشاب (بغضب): مش تفتحي انتى عاميه ؟

ياسمين واقفه مش بتنطق وباصه ل الشاب , لف الشاب بغضب ومشي خطوات لحد ما وقف علي صوت بسمه

بسمه (بغضب): لو سمحت, ممكن تقف لحظة

مع تحيات: egdrama